რკინიგზის მოდერნიზაციის პროექტის საპროექტო-სამშენებლო სამუშაოების შესყიდვის პირველი ეტაპი დასრულდა
დეკემბერი 01, 2010

საქართველოს რკინიგზის მოდერნიზაციის პროექტის ”ბათუმიდან თბილისამდე - 3 საათში” საპროექტო-სამშენებლო სამუშაოების შესყიდვის პირველი ეტაპი 30 ნოემბერს დასრულდა.

ორეტაპიან ტენდერში, რომელიც შპს ”საქართველოს რკინიგზამ” მიმდინარე წლის 17 სექტემბერს გამოაცხადა 13 კომპანიამ მიიღო მონაწილეობა. ტენდერის პირველი ეტაპი პრეტენდენტის საკვალიფიკაციო მონაცემებისა და პირველადი სატენდერო წინადადების წარდგენას ითვალისწინებდა. შედეგად, ევროპისა და აზიის სარკინიგზო დარგში გამოცდილი 13 კომპანია გამოვლინდა, მათ შორის ისეთი ცნობილი კომპანიები, როგორებიც არიან: ჩინეთის რკინიგზა, ”დეუ”, ”ჰიუნდაი”, ”სალცეფი”, ”ასიგნია” და სხვ. რკინიგზის მოდერნიზაციის პროექტის მეორე ეტაპი ტექნიკური წინადადებისა და სამუშაოების ღირებულების წარდგენას ითვალისწინებს.

საქართველოს რკინიგზის მოთხოვნით იმ კომპანიამ, რომელიც ტენდერში გაიმარჯვებს, სამშენებლო სამუშაოების შესრულებაში საინჟინრო ტექნიკური პერსონალისა და მუშა-მოსამსახურეების შემადგენლობის არანაკლებ 70 % საქართველოს მოქალაქეები უნდა დაასაქმოს.მშენებლობის სავარაუდო ღირებულება 250 მილიონ შვეიცარულ ფრანკს შეადგენს.

რკინიგზის მოდერნიზაციის საპროექტო-სამშენებლო სამუშაოები 2013 წლის 1 ივლისისათვის დასრულება. საქართველოს რკინიგზამ” რკინიგზის მოდერნიზაციის ტექნიკურ-ეკონომიკური დასაბუთებისა და პირველადი სამშენებლო პროექტის მომზადება დაუკვეთა ფრანგულ-ქართულ კონსორციუმს, რომლის ლიდერიც კომპანია SYSTRA არის. პროექტის განხორციელების შედეგად ბათუმიდან თბილისამდე მატარებლით მგზავრობის ხანგრძლივობა მხოლოდ სამი საათი იქნება.

 
 
Copyright © 2017 Georgian Railway. All Rights Reserved.